Опубликовано: 19.07.2016

Нам улууһугар «Бизнес-инкубаторга» олохтоох урбаанньыттар презентациялара буолан ааста. Тэрээһин аһыллыытын директор Алексей Винокуров иилээн-саҕалаан ыытта, ыҥырыллан кэлбит ыалдьыттар «Нам улууһа» МТ баһылыгын бастакы солбуйаачыта Инна Сивцева, баһылыгы тыа хаһаайыстыбатыгар уонна предпринимательствоҕа солбуйааччы Ефим Гоголев, баһылыгы экономикаҕа солбуйааччы Марина Обутова эҕэрдэ тылларын тиэртилэр, таһаарыылаах үлэни баҕардылар. Резиденнэр ааттарыттан директор Алексей Винокуров «Бизнес-инкубатор» тэриллиитигэр кылааттарын киллэрсибит салайааччыларга махтал суруктары туттартаата.

Мустубут дьоҥҥо бэйэ дьыалатын саҥа саҕалааччылар Вячеслав Бурцев –сервиснэй киин, компьютернай техниканы диагоностикалааччы, өрөмүөннээччи; Юрий Петров – эт астан полуфабрикаттары оҥорон атыылааччы; Валерий Федоров – фотостудия хаһаайына, Дария Матвеева – кэрэ буолуу салонун хаһаайката үлэлэрин хайысхатын билиһиннэрдилэр. Кэлбит ыалдьыттар резиденнэр үлэлэрин көрдүлэр-иҕиттилэр, бородууксуйаларын дегустациялаатылар. Дария Матвеева салайааччылаах «Тиара» салоҥҥа оҥорбут бөрөчүөскэлэрин, макияжтарын көрдөрдүлэр. Тэрээһини эрчимнээх, тэтимнээх ырыаһыт Кэскил Баишев эбии киэргэтэн биэрдэ.

Аксинья ТАТАРИНОВА

Хаартыскаҕа Семен АРГУНОВ түһэриитэ