Опубликовано: 20.05.2019

Киһи олох олороругар үлэлээх, сөбүлүүр дьарыктаах буолуохтаах. Билигин ханнык баҕарар эйгэҕэ уопута, ыстааһа  суох буоллаххына үлэҕэ ылбаттар. Кыһыл дипломунан, университеты  бүтэрбит устудьуоннар үлэ көрдөһөллөрө элбээбит, ыччат-дьон үлэтэ суох ускул-тэскил барыылара баһыйбыт диэн эттилэр. Билиҥҥи үйэҕэ бэйэ дьыалатын арыйыы элбээбит. Онно туһааннаах араас маастар-кылаастар, тургутуктар, үөрэтэр оскуолалара бааллар. Оттон сорох дьон бизнес арыныахтарын баҕараллар да, бастаан тугу гыныахтарын, кимтэн сүбэлэтиэхтэрин билбэттэр. Дьокууускайдааҕы Бизнес-инкубатор нэһилиэнньэҕэ анаан бэйэ бизнеһин оҥорорго араас хабааннаах үлэлэри ыытар. Олортон биирдэстэрэ стартап акселерятор бырагыраама буолар.


СТАРТАП АКСЕЛЕРЯТОР БЫРАГЫРААМА ДИЭН ТУГУЙ?

Акселератор — хампаанньа. Бэйэҥ оҥорбут бизнеһинэн атын тэрилтэлэргэ киирэр түгэнэ. Атыннык эттэххэ резидент диэн буолар.

Акселератордар резиденнэргэ бизнестэрин бырагырааматын оҥорон биэрэллэр. Хас биирдии тэрилтэ бэйэтэ хамаандалаах буолуохтаах. Ол курдук, оҥорон таһаарар бородууксуйаҥ атыыга тахсарыгар бизнес-модель баар буолуохтаах. Бизнес-модель атыы хамаҕатык  барарыгар эппиэттиир. Акселератордар бэйэлэрэ бас билэр муннуктаахтар, дьиэлээхтэр, үлэлиир усулуобуйалаахтар. Резидент бизнеһэ үлэлиирин тухары бу хампаанньа бас билэр сиригэр-уотугар олорор бырааптаах.

Стартап – саҕалааһын. Бэйэтэ этэрин курдук “старт” диэн тылтан таһаарбыттар. Бизнес эйгэтигэр стартап диэн тиэрмининэн быһаарсаллар, өйдөһөллөр.

БИЗНЕС-ИНКУБАТОР ӨҤӨТӨ БАҺААМ

Бэйэ дьыалатын арынар дьоҥҥо анаан өрөспүүбүлүкэҕэ Бизнес-инкубатордар көмө оҥороллор. Ол курдук, саҥа саҕалаан эрэр урбаанньыкка чэпчэки сыанаҕа үлэлиир сир биэрэллэр. Тэрилтэ сайдарыгар, киһи атаҕар турарыгар сөптөөх усулуобуйа оҥоһуллар. Ол курдук, Бизнес-инкубаторга хос, компьютер, принтер, остуол, олоппос,  бэл диэтэр төлөпүөнүгэр тиийэ бэриллэр. Бизнес-инкубаторга киирэр туһугар эмиэ куонкурус ааһыахтааххыт. Туһааннаах докумуоннары бэлэмниэххэ уонна бизнес-былаан суруйуохха наада. Манна стартап акселератор куонкурус саамай сөптөөҕүнэн ааҕыллан тахсар.

ХАЙДАХ КЫТТАБЫТ? ТУГУ ГЫНАБЫТ?

Стартап акселеряторга ким баҕалаах кыттыан сөп, сааһынан хааччаҕа суох, буор-босхо. Акселеряция быһа эфиринэн онлайн-нөҥүө ыытыллар. Бырагыраама уопсайа 25 лиэксийэттэн,  19 тургутуктан турар. Бу үөрэх устата эһиги хайдах бизнес-идея айыы, оҥорон таһаарар бородууксуйаҕытын батарыы, социальнай ситимҥэ анал сайт, үбү хайдах эргинии туһунан билиэххит. Хас биирдии лиэксийэ түмүгэр араас хабааннаах сорудахтар бааллар уонна тургутук ахсын баал туруораллар.

 

ХАННА СУРУТТАРАБЫТ ?

https://incubator.b14.ru/edu – бу сайтка киирэн босхо регистрацияланаҕыт. Электроннай аадырыс нөҥүө эйиэххэ сурук кэлиэ. Сурукка ыйылла сылдьар аадырыска киирэн үөрэххин саҕалыыгын. Бириэмэтинэн хааччаҕа суох.

КИМНЭЭХ БЭРЭБИЭРКЭЛИИЛЛЭР?

Хас биирдии хамаанда бэйэтэ салайааччылаах буолар о.э. наставник. Кинилэр, оҥорбут сорудаххытын бэрэбиэркэлииллэр уонна баал туруораллар. Инникилээх бырайыактар финалга ааһыахтара уонна улахан тэрилтэлэргэ инвестордарынан ананыахтара. Сүүрбэ финалга тахсыбыт кыттааччы, сертификатынан уонна Бизнес-инкубатор өҥөлөрүнэн Дьокуускайга уонна Нерюнгри куораттарга туһаныахтара. Күрэхтэһиии сүрүн сыала, урбаанньыттар ахсааннарын Дьокуускай куоракка уон төгүл элбэтии буолар диэн эттилэр.

«Акселерационнай бырагыраама кыттааччылара, үс нэдиэлэ устата бырайыак идеятыттан саҕалаан халыыбыгар тиийэ оҥоруохтара. Улахан бырайыагы оҥорорго элбэх сыллар ааһаллар.  Бу билиҥҥи, сайдыылаах үйэҕэ, көҕүлүүр дьоннор баалларын иһин, судургу буолла»,  диэн СӨ Бизнес-инкубаторын дириэктэрэ Максим Карбушев бэлиэтээтэ.

Бэлиэтээн эттэххэ, стартап-акселератор Арассыыйатааҕы бастакы венчурнай инвестор Александр Румянцев  өйөбүлүнэн ыытыллар. Александрга билиҥҥи туругунан уопсайа 60-тан тахса үлэлии турар бизнестээх. Бу барыта Бизнес-инкубатортан үбүлэммит бизнестэр.

Александр Румянцев, акселеряция кыттааччыларга бэйэлэрин идеяларын, былааннарын бизнестэрин саҕалыырга кубулутуо, инвестордары уонна көмөлөһөөччүлэри буларга өйөбүл буолуо диэн эттэ. Сонун этиилэрдээх, иһиттиннэриилээх дьон кимтэн да тутулуга суох сөбүлүүр дьарыктаах, бэйэ тэрилтэлээх буолуоххутун сөп.

 

ҮӨРҮЙЭХ УСТАТЫН ТУХАРЫ ТУГУ ТУҺАНАБЫТ?

Маҥнайгы үктэлэ

  • Урбаанньыт буоларга үөрэнии, дьону кытта уопсай тылы булуу.
  • Стартап саҕалыырга идея толкуйдааһын.

Хамаанданы көҕүлээһин

– Хамаанда диэн тугуй ?

– Хамаанда хомуйуу.

-Хамаанданы хайдах гынан түмэбит ?

Ырыынак эйгэтигэр киирии бородууксуйата

  • Бородууксуйа оҥоһуллан тахсыытын чаастара уонна араастара.
  • Социальнай ситимҥэ сайт оҥоруу уонна кинини атыы-эргиэн эйгэтигэр эргинии.
  • Кыра бородууксуйаны улахан эйгэҕэ таһаарыы.

 

Атыылаһааччыны үөрэтии, табаар ырыынак эйгэтигэр тахсыыта

  • Атыылаһааччыны кытта алтыһыы, кини кыһалҕатын быһаарыы.
  • Ырыынак эйгэтин кытта ыкса сибээстэһии.

Бизнеһин үбүлээһин

  • Харчы хантан кэлэрий уонна ханна барарый?
  • Харчыны хайдах эргинэбит?
  • Инвестордарга билиһиннэрии уонна табаары атыылааһын.
  • Киэҥ эйгэҕэ харчы кэлэрин өйдөөһүн.

 

Атыылааһын

  • Стартап халыыптарын үөрэтии
  • Атыылааһын ханааллара.
  • Таргетинговай рекламаны үөрэтии уонна социальнай ситими кытта холбоон интэриниэт нөҥүө атыылааһын.
  • My target диэн тугуй?
  • Яндекс аатырбыт тэрилтэтин нөҥүө табаары эргинии.

 

Айталина Софронова